හිඟන කොල්ලෙක්ගේ ආදර පැතුම්...

ජීවිතේ බබා චුට්ටක් කචල් වගේ නේද...
මං කියන්නේ නිකං පැටලිලා පැටලිලා වගේ නේද....

බලන්න....

කවදාවත් නැති විදිහට සීතලයි.
හෙට අනිද්දා ස්වීටර් අදින්නත් වෙයි...
හද්දා වැස්ස....
වැව් ඔක්කොම වානේ දානවා.
ඇල වේලි පුපුරලා යනවා.
ඇනිකට් උතුරනවා.
සොරොව් ඉබේම අරිලා පුපුරනවා.

මින්නේරියේ ගංගා
ප්‍රජා ශාලාවේ.....
අනුරාධපුරේ රන්මලී
සෙන්ට්‍රල් එකේ ශාලාවේ....
කඩුවුලු වැවේ සඟරා මිටියකුත්
ගහගෙන ගිහින්....

මේ පැත්තෙන් පොල් ගෙඩිය හැටයි
අමු මිරිස් සීයයි...
පොල්තෙල් තුන්සීයයි....
පහනක් පත්තු කරන්නවත් හිතෙන්නෙ නෑ....

ලාබ එකම දේ
අවුට් ගොඉන් කෝල් රේට්ස් විතරයි.
ඒ නිසා පනහක සීයක රීලෝඩ් එකක් දාගෙන
 අපි තකා කරනවා...

ඔයාට කොහොමද අනේ...
ඒ පැත්තෙන් අඩනවා.
හෝ ගාල අඩනවා.
ඇයි වස්තුවේ .මේ...
අයියට කතා කලා
දැයට කිරැළ බලන්න යන්න
එයාට බැහැලු....
ඔන්න කතාව..... මේ රටේ පැත්තක් යටවෙලා
මෙයාට දැයට කිරැළ.. ෂෝක්....

අනේ මන්දා මොනා කරන්නද කියලා
වෙලාවකට හිතෙනවා තනියම ඉන්නත් නේද
කසාද බැදලා කොහොම උයන් කන්නද
බඩවල් උස්සගෙන දුක් විදිනකොට
ආදරේ කොහෙන් යයිද...

අපි ටිකක් ඉම්...මු....

ඇයි....

නෑ.... ලබන අවුරැද්දේ විතර බඳිමු.
අඩුම ගානේ පොල් මිලවත්
අඩු වෙනකල් ඉවසමු.

මං ඔයාට පොල් කිරි නොදා
කෑම හදලා දෙන්නම්..

පිස්සදු...

පොල් කිරි නොදා මොන කිරි දාන්නද....

(හරියට හිනා)

ජීවිතේ අමු පල් අයියෝ....
කිසිම ගතියක් නෑ
ජීවිතේට අලුත් ගෝ එකක් ඕන
මොන ගෝද... බස් ගාස්තුත් යනවලු...
ඊට පස්සේ පැට්‍රල්....
ඊට පස්සේ කිරිපිටි....
ඒකනේ කිව්වේ බඳින්නැතිව ඉමු කියලා...
බබාල හදා ගත්තම හරි ප්‍රශ්න
උන්ව ඉස්කෝලෙ දාන්න ඊට වඩා ප්‍රශ්න
ඔයාට ඉතිංන් ජාතික පාසලකට දාගන්න ඕනි කියයි.

වැඩක් නෑ යකෝ...
එක්කෝ අපි බදාන අඩමු
නැත්නම් බදාගෙන....

ඔයාට විහිලු... ජීවිතේ ගැන
සීරියස් හිතන්න බබා....
ඔයා මොනවද මේ කරන්නේ...

ඔයා දන්නවද....

අනාරක්ෂිත ලංගික එකතුවීඹක් උනොත්
පැය තිස් හයකට ඉස්සෙල්ලා
පොසිටිනෝ දෙකක් බොන්නලු.
බබාලා හිටින්නෑලු
පවුල් සංවිධානෙන් කියන්නේ

අනේ බබා මේකත්
ජීවිතයක්ද....

මාත් කියන්නේ ඒක තමා වස්තුවේ.
මේකත් ජීවිතයක්ද....

කොහොමද බඳින්නේ කෙල්ලේ
පවුම් තිස් අටදාහක්

කමක් නෑ ඉමිටේෂන් දාන්න....

වෙලාවකට හිතෙනවා ඇස් පියාගෙන
උඩරට මැණිකේ එකට පින්න
ඒකත් මේ දවල් වල නෑ
පීල්ලට කඳු නාය ඇවිත්

අනේ හිනාවෙන්න එපා
අද ජීවිතේ ඔහොමයි.
ඒත් ඔයා ජීවත් වෙන්න හිත හදාගන්ඩ

අපිට හෙට අනිද්දා මොනවා
මොනවා හරි වෙයි සුදූ
ඒ හින්දා ඔහේ ඉමු
කොහොමත් 2012 ලෝක විනාශයලුනේ
ඊට පස්සේ අලුත් විහ්වයක අපි හුමුවෙමු

එහෙම උනොත් ඔයා මලක් වෙන්න
මම මේ මහ පොළොව වෙන්නම්
පරවෙච්ච චාකට කඩාගෙන වැටෙන්න
බායි.....

මං හිඟන්න....

අනේ ආදරය කොච්චර ලස්සනද?

• ආදරය යනු දෙදෙනෙකු විසින් කරන දෙදෙනාටම ජය අත්වන ක්‍රීඩාවක්... ඒ නිසා කවමදාකවත් ඔබේ පෙම්වතා පෙම්වතියව පරාජය කර වීරයෙක් වන්නට යන්න එපා...
• ආදරය යනු පරිත්‍යාගයයි.  අනෙකා වෙනුවෙන් කරන කැපකිරීමයි. අනෙකා වෙනුවෙන් ජීවත් වීමයි.
• දෙවියන්ට හැමවිටකදීම මිනිස්සුන්ට කතා කරන්න නොහැකි නිසා දෙවියන් ආදරය මැව්වේය. ආදරය ඇති හැම තැනකම දෙවියන් වැඩ සිටිනා බව මතක තබා ගන්න
• හැම කෙනෙකුගේම හදවතේ දෙවියෙකුත් යක්ෂයෙකුත් ඉදියි. යක්ෂයා රජවූ විට කෙනෙක් වෛර කරයි. ඊර්ෂ්‍යා කරයි. දෙවියා රජ වූ විට ආදරය කරයි.
• ආදරය යනු ලබන දෙයක් නොවේ. දෙන දෙයකි. පූජා කරන දෙයක්. ඒ නිසා ආදරය ලැබීමට පෙර දන් දෙන්න
• ආදරය ජීවිතයේ අමාරැම දුෂ්කරම මොහොතෙදීත් ජීවත් වීමට උපකාර කරනවා. ජීවත් වෙන්න ධෛරයත් දෙනවා
• හදවතක නිර්මලත්වය කැඩපතක් වගේ. නිසල දිය විලක් වගේ. ඉන් හැම විටම පේන්නේ ආදරයේ ප්‍රතිමූර්තියයි.
• ජීවිතයේ ලස්සන බලන්නට ඔබ කැමතිද? එසේනම් වරක් ආදරය කර බලන්න. ජීවිතයේ කැත බලන්නට ඔබට අවශ්‍යද? එසේනම් එක් අයෙකුට වෛර කරන බලන්න.
• දෙදෙනෙක් ආදරය කරද්දී ඒ දෙදෙනා අතර කාන්දම් බලයක් හට ගනී. ඒ බලයන්ට දෙවියන් පවා ආකර්ෂණය වේ.
• ආදරයේදී සාධාරණ වන්න. ඒ වෙනුවෙන් ඔබට දිය හැකි දේ මිස ඉන් සූරා ගත හැකි දේ ගැන නොසිතන්න. ආදරයට ආදරය දෙන තරමට ආදරයම ලැබෙන බව සිහිතබා ගන්න
• ආදරය උදෑසණ වැටෙන පිණි බිඳක් මෙන් පිරිසිදුය. එය රාගයෙන් අපිරිසිදු නොකරන්න. ඔබේ ආදරයේ මිහිරිහ මොහොතේදී ඔබේ ශරීරයට උණුසුමක් දැනේවි. එය රාගය නොවේ. ආදරයේ පරම නිර්මල ශෘන්ගාරයයි. එය විදින්න
• ඔබ ලෝකයේ ලස්සනම දේ බලන්නට කැමතිද? ඔබේ ලෝකයේ පිවිතුරැ දේ ඇත්තේ ඔබට ආදරය කරන ඒ දෑස් වලයි. 
• ඔබටත් වඩා ඔබ ගැන හිතන කෙනෙක් ඇත්නම් ඒ ඔබ ආදරය කරන කෙනාය. ඒ ආත්මය වෙනුවෙන් ජීවත් වෙන්න. ඔබ කවදාවත් තනි නොවනු ඇත.
• කරදරයක්, දුකක්, විපතක් එන සෑම මොහොතකම ආදරය ගැන සිතමින් ජීවත් වන්න. සැබෑ ආදරයකට පුදුමාකාර බලයක් ඇත. ඒ ගුප්ත බලය හදවතින් විදගන්න.
• කෙනෙක් උතුම් වෙන්නේ ආදරය ලැබීමෙන් නෙවේ. ආදරය කිරීමෙන්. ආදරය කිරීමෙන් කෙනෙකුට පිරිසිදු විය හැක. උතුම් කෙනෙකු විය හැක. 
• ආදරයේදී වැදගත් වන්නේ රසබර චොකලට්වත්, රතු රෝසවත්, වටිනා රත්තරන්වත් නොවේ. පිරිසිදු හදවතයි. එය පිරිසිදුවම තිළිණ කරන්න. ඔබට ලෝකයම ලැබේවි.
• කෙනෙකුට මරණයේදීත් ජීවත් විය හැක්කේ ආදරය නිසාය. එසේම කෙනෙක් ජීවත් වෙද්දීත් මැරෙන්නේත් ආදරය නිසාය. ආදරය නිසා කෙනෙකුගේ හදවතේ ඇතිවන මරණීය තුවලා සුවපත් කල හැක්කේද ආදරයටමයි. පුදුම ඒකය.
• ඔබට දෙවියන් පෙනෙනවාද? එසේ නොසිතන්න. ඔබ හොඳින් සැබෑ ලෙසම ආදරය කරද්දී ඔබට දෙවියන් පෙනීම කෙසේ වෙතත් දෙවියන්ට ඔබව පෙනෙනු ඇත

පුතු තුළින් වත් නුඹට සහනයක් ලැබේවා...!

කල්පයක් පෙරු පිරුම් මොහොතකින් සිඳ බින්දු
කල්පයක් රැකි කිරට මුහු වෙච්ච ගොම බින්දු
ආත්මය පාරවන නුඹේ දුක රැඳි සින්දු
මට පුදුම නුඹෙ දිරිය, දැවෙන හදවත රැන්දු

දරුවාගෙ' නාමයෙන් මා පියන් අතැර නුඹ
විඳවනා දුක් ගැහැට, මලක් සේ හැදුණු නුඹ
කිසිවකට හිමි සමඟ අමනාප නොවී නුඹ
පතිවතම රකින රන් හෙළ කතකි නඟේ නුඹ

හිමිගෙ' ගෙරැවුම් පවා ගීයක් ව ඇසේවා
අග හිඟය නිමා වී සිත සතුට මැවේවා
හෙලන හැම ඩා බිඳම සුවයක්ම ගෙනේවා
පුතු තුළින් වත් නුඹට සහනයක් ලැබේවා...!

අනාථ කවියා

කවියද ඔයාද
දෙකෙන් එකක්
තෝරගන්න කිව්වම
කවි ලියපු
අතත් එක්කම කපලා
වැළලුවා මම පෑන
අපේ ගෙදර
වත්ත පහල

ඌවද මාවද
දෙකෙන් එකක්
තෝරගන්න කියලා
මම කිව්වම
ඔයා
ඌව
තෝරගත්තට පස්සෙ
මම
වත්ත පහලට ගිහින්
හෑරුවා ආපහු වළ

ප්ලාස්ටික් පෑන
දිරලා නැතත් තාම
ඒක එක්ක වලදාපු
මගේ අත
නෑ පේන්ඩ
දිරලා ගිහිල්ලද කොහෙද

සිහින කුමාරි

වෙල් ඉපනැල්ලේ
ගo දිය අයිනේ
හමුවීලා... පෙම්බස් දෙඩුවා..
මතකයි මතකයි හැමදා....

තරු මල් යහනේ
සඳ කැන් වතුරේ
කිමිදීලා...පෙම් ගී ගැයුවා...
අද වාගෙම පෙරදා...

කළුවර දුරලූ - පහනක් වාගේ
පෝදා අහසේ - සඳ මා තුරුලේ
නෑ නෑ දුර නෑ - මගෙමයි කුමරී

පැතුමන් ඉටුවිලා
මගෙ වී දිවියේ
මනමාළි... මගෙ ලොව රැජිනී..
නුඹමයි මාගේ කුමරී...

සුදු සඳ එළියේ - සැතපී තුරුලේ
නැලවෙන් කුමරී - සිහින විමානේ...
නැලවෙන් කුමරී - පෙම් මල් යහනේ...

මේ ගලන කඳුළු
ගිනි කන්දකින් වැටෙන ලෝදිය වී 
නුඹ මතට කඩා හැළුනා  නම්,
මා දැවෙන තරමක්,
නුඹට දැනගන්නට තිබුනා,.


මේ ගැහෙන හදවත,
වේදනා විඳින තරමක්,
මගේ හදවතේ ලේ බිඳුවක් වෙලා
නුඹ ගලා ගියා නම්,.
නුඹට දැනගන්නට තිබුනා,..


මේ ලියන කවි පද,
මගේ සුරතේ ‍රැ‍ඳෙන පන්හිඳ වී
නුඹට පෙනුනා නම්,
මා පෙම් කරන තරමක්,
නුඹට දැනගන්නට තිබුනා,.

දැක්ම

"අපේ යක්කුන්ට
 තේරෙන්නෑ මල්ලි
 හයි වේ හදලා
 හැමතැනම
 සී ප්ලේන් එකේ
 යතෑකි රට වටේම
 කොච්චර කළත්
 අගයක් නෑ අපේ උන්ට"

එහෙම කියලා
ධර්මේ අයියා එල්ලුනා
කෝච්චියේ
ෆුට් බෝඩ් එකේ

"ඕයි
 යනවලකො
 පොඩ්ඩක් ඇතුලට
 පේන්නැද්ද
 දොරේ යන්නෙත්
 මිනිස්සුම තමයි
 තමුසෙලා විතරක්
 සැපට ගියාම හරිද?"

අසිරිමත්ම සිදුවීම

පහුගිය සතිය හරිම කාර්ය බහුලව තමයි ගත උනේ.අත්දැකීම්, කකුල්දැකීම් රාශියක් ලබා ගන්න පුළුවං උනා.ජීවිතේට වටින කියන පාඩම් රැසක් එක්ක මිනිස්සු අඳුර ගන්න, ජීවිතේ තේරුම් ගන්න වැදගත් සිදුවීම් බහුල සතියක්.

ඇත්තටම කියන්න හැදුවෙ පහුගිය සතියේ මගේ ඇස් දෙකෙන් ලෝකේ සිද්දවෙන අසිරිමත්ම සිදුවීම දැකගන්න මට වාසනාව ලැබුණා කියලා.දරු ප්‍රසූතියක් හැබෑවට දකින්න ලංකාවෙනං ගොඩක් දෙනෙක්ට ලැබෙන්නෙ නෑ.අපි පහුගිය සති දෙකේම හිටියෙ දි සොයිසා කාන්තා රෝහලේ.දරු ප්‍රසූතියක තියෙන ඒ ආශ්චර්යමත් බව ගැන කතන්දර අහලා තිබුණට සහ පොත්වලින් කියවලා තිබුණට ඒක මොනවගේද කියලා දැකගන්න මම පුදුම කුතුහලයකිං හිටියෙ.ඒක ඉටු කරලා දීපු සොයිසා රෝහලට දීර්ඝායු වේවා!!!!

අපි යනකොට ඒ අම්මා කෙනෙක් වෙන්න බලාපොරොත්තුවෙං හිටපු විසිහැවිරිදි මුස්ලිම් තරුණියට විලිරුදාව, එහෙම නැත්තං පොෂ් විදිහට කියන 'ලේබර් පේන්ස්' පටං අරං.ඇයට සින්ටොසින් කියන කෘත්‍රිම හෝමෝනය දීලා තිබුනෙ ප්‍රසූතිය වේගවත් කරන්න.

ඇත්තටම මම ප්‍රසූතිය ගැන වෛද්‍ය විද්‍යාත්මකව නොකියා සාමාන්‍ය මනුස්සයෙක්ගේ දෘෂ්ඨි කෝණයෙන් කියන එක හොඳයි.මොකද ඒක හුදී ජනයාට තේරෙන්නෙ හුදී ජනයෙක්ම කිව්වොත්නෙ.අනික වෛද්‍ය දේශනයක් කරන්න තරං ලොකු දැනුමකුත් මට නෑ.

ඇයගේ දරුවා බිහිවෙනකන් අපිට සෑහෙන වෙලාවක් බලාගෙන ඉන්න සිද්ද උනා.සාමාන්‍යයෙන් දරු උපතකට මුල්ම වෙදනාව පැමිණීමේ සිට පැය පහළවක්, දහ අටක් විතර යනවා කියලා තමයි අපිට එතන හිටපු නර්ස් කෙනෙක් කිව්වෙ.නමුත් සින්ටොසින් කියන හෝමෝනය මගින් ඒක පැය බාගයත්, පැය හතරත් අතර කාලයකට අඩු කරනවාලු.මේක ඇහුවම මට මතක් උනේ ඉස්සර කාලෙ ගෑනුන්ට ළමයි හම්බ උනු හැටි.පැය ගාණක් අර ළමයි වදන කාමරේට වෙලා වහලෙන් එල්ලෙන කඹයක් අල්ලගෙන ගැම්ම අරං ළමයා එළියට දාන්න දත කන හැටි.අර පොඩි ජනේලයක් තියෙන කරුවල මූසල පාට කාමරේක යාන්තං ඇවිලෙන පහන් දැල්ලක් වෙව්ලනවා මම හිතන්නෙ ඔයාලත් දැකලා ඇති ෆිල්ම්වල, නාට්‍යවල එහෙම.

මේ අම්මටත් ටිකක් වේදනාව විඳින්න උනා ප්‍රසූතිය නිසි විදිහට පටන් ගන්නකන්.ඒ කාලය අතරතුරදි නර්ස්ලගේ අකාරුණික කතා අහං ඉන්නත් මේ ලෝකෙ ඉහලම වේදනාව විඳින්න සූදානම් වෙන අම්මලට සිද්ද වෙන බව කියන්නම ඕනෙ.කොහොම හරි ප්‍රසූතියට හෙදියන්ගේ මැදිහත් වීම අවශ්‍යවෙන වෙලාව වෙනකොටනං ඒ අය කරුණාවෙන් කතා කරලා උපදෙස් දෙන්න පටං ගත්ත.අනේ මන්දා ගෑනුංගෙ හැටි.මුල ඉඳංම කරුණාවෙන් කතා කළානං මොකද වෙන්නෙ.මගෙ මිත්‍රයෙක් කිව්වා අම්මලට හොඳිං කිව්වම කියන දේ අහන්නෑලු.ඒකලු බණින්නෙ.මම උගෙන් ඇහුවා එතකොට ප්‍රයිවට් හොස්පිට්ල්වලට එන අම්මලා මේ වගේ නෙමෙයිද?උන්ටනං මොනවා කළත් හරි ආදරෙං කතා කරන්නෙ කියලා.ඇත්ත තමයි කියලා ඌත් කියනවා එතකොට.

ඔන්න දැං අම්මගේ වෝටර් බෑග් එක කැඩිලා ඒකෙ තියෙන දියරය වෑස්සෙන්න පටන් ගත්තා.නර්ස් කෙනෙක් ඇවිත් දරුවා බිහිකරන්න අම්මා තටමන්න ඕනෙ විදිහ කියලා දුන්නා.කට්ටිය මේක බලලා ඕනෙනං නිකං ඉන්න වෙලාවට පුරුදු උනත් පාඩුවක්නං වෙන්නෙ නෑ.ඇඳේ උඩු අතට නිදාගෙන කකුල් දෙක දණහිසෙන් සහ ඉණෙන් නමලා, අත් දෙක කකුල් දෙකට දෙපැත්තෙන් යවලා යටි පතුල් දෙක අල්ලගන්න ඕනෙ.ඊට පස්සෙ කකුල් දෙක පුළුවන් තරම් දෙපැත්තට ඈත් කරලා තටමන්න තමයි නර්ස්නං කිව්වෙ.හැබැයි ළමයාව එළියට දාන එකත් අම්මට ඕනෙ ඕනෙ විදිහට කරන්න බෑ.වේදනාව දැනෙන කොට තමයි ගර්භාශය සංකෝචනය වෙන්නෙ.අන්න ඒ වෙලාවට විතරයි අම්මත් තටමලා ඒ ක්‍රියාවට සහයෝගය දෙන්න ඕනෙ.

ටික වෙලාවකිං අපිට දරුවගෙ කොණ්ඩය පේන්න පටං ගත්තා.මුළින් යන්තමට පෙණුනෙ.වේදනාවත් එක්ක අම්මා තටමද්දි යන්තං පේන්න ගන්නවා.වේදනාවයි තැටමීමයි නවත්තපුවාම ආයෙත් ඇතුලට යනවා.බොහොම වෙලාවක් මේ ක්‍රියාව සිද්ද වෙවී තිබ්බා.හැබැයි ටික ටික දරුවාගේ ඔළුව පේන එක වැඩි උනා.

ඒක සෑහෙන්න පේන්න ගත්තට පස්සෙ තමයි 'එපිසියොටොමි' කියන යෝනි මාර්ගය විශාල කිරීමේ කැපුම නර්ස් කෙනෙක් දැම්මෙ.ඒකෙං රුධිර වහනයක් සිද්ධ උනත් ඒක නිසා දරුවා බිහි වීම පහසු වෙනවා වගේම අම්මාගේ පටකවලට සිද්ධ වෙන හානියත් අවම වෙනවා.

දරුවා එළියට ගන්න කට්ටිය සෑහෙන කට්ටක් කෑවා.අපි බලං හිටියා.පොඩි එකා සෑහෙන්න ලොකුයිලු.ඒකලු ගන්න අමාරු.නර්ස්ලා ඇඟිලි දාලා මාර්ගය ලොකු කරලා දරුවව ගත්තා.අලි සයිස් කොලු පැටියෙක්.කොල්ලාව ගත්ත ගමං ඌව අම්මගෙ බඩ උඩින් තිබ්බා.ඒක තමයි මම බලාගෙන හිටපු මොහොත.අම්මගෙ මූණෙ වේදනාව ඔක්කොම එක පාරට අතුරුදහන් වෙලා යන හැටි, අති මහත් වෙහෙස මැද්දෙන් උතුරලා දෝරෙ ගලන සතුටක් එක්ක වෙහෙසකර හිනාවක් මතුවෙච්ච හැටි මට වචනවලින් නං ලියන්න තේරෙන්නෙ නෑ.අර අපිට ඇඬෙන්න එනකොට උගුරෙ ගුලියක් හිරවෙනවා වගේ දැනෙන ගතියක් මට ඒ වෙලාවෙ දැනුණා.

අම්මට තමන්ගෙ සිරුරට තවමත් පෙකණිවැලෙන් සම්බන්ධවෙලා ඉන්න කොලු පැටියව මේ ඔයාගේ දරුවා කියලා පෙන්නලා තමයි පෙකණි වැල කපන්නෙ.ඊට පස්සෙ අම්මගෙයි දරුවගෙයි එකම සළකුණු දෙකක් අත්වල ගැටගහලා කොල්ලව අරගත්තා පිහදාලා පිරිසිඳු කරන්න.කොල්ලගෙ බර කිව්වට විශ්වාස කරන්න කිලෝ 3යි ග්‍රෑම් 680ක්!!!!.  රජ කොලු පැටියෙක් තමයි.දාරක ස්නේහයක්ද කොහෙද මටත් ඇති උනා.අපේ රටේ තාත්තලට තමංගෙ දරුවා මේ ලෝකෙට බිහිවෙද්දි ළඟ ඉන්න දෙනවනං කොච්චර වටිනවද කියලා මට හිතෙනවා.මොකද මේ අහක ඉන්න මටත් එච්චර හැඟීමක් ආව එකේ තාත්තා කෙනෙක්ට කොච්චර සෙනෙහසක් ඇතිවෙයිද?

රෙජීම වෙනසක අරුනලු: 'ඔක්යුපයින්ග් වෝල් ස්ට්රීට්' හෙවත් මනුශ්යත්වය කරා නැවතත්...........

ලොව පුරා නිදහස් සුළං හමන්නට පටන්ගෙන ඇත. සැබෑ ප්‍රජාතන්ත්‍රවාදය....ජනතාවගේ ප්‍රජාතන්ත්‍රවාදය වෙනුවෙන් අරගල බිම් නිර්මානය වෙමින් තිබේ. ටියුනීසියවෙන්, ඊජිප්තුවෙන්,ලිබියාවෙන් සිරියාව හරහා නිව්යෝර්ක්, ලංඩන්,ඇතන්ස්, මැඩ්‍රිඩ් මෙල්බර්න් වෙත මේ නිදහස් සුළඟ හමා එමින් ඇත. බෙලා, මුබාරක්,සලේ, ගඩාෆි, අසාද් වැනි පුද්ගල ඒකාධිපතියන්ට එරෙහිව මෙන්ම ඊනියා ලිබරල් ආර්තික ක්‍රියාවලිය හරහා ලෝක ආර්ථික දේශපාලනය හසුරුවන මූල්‍ය සමාගම් ඇතුලු බහු ජාතික කොම්පැනි වල ආර්ථික ඒකාධිපතියන්ටද එරෙහිවද මිනිසුන් වීදි බැස ඇත. 'ඔක්‍යුපයින්ග් වෝල් ස්ට්‍රිට්' විරෝදතා ව්‍යාපාරයේ හරය එයයි. සියයට එකක් විසින් 99%ක් ජනතාවගේ ජීවිතය හුසුරුවන මේ ක්‍රමයට එරෙහි හඬ එයයි. විකල්පයක් වෙනුවෙන්වන බලාපොරොත්තුවේ නියෝජනය එයයි. සියලු වටිනාකම්, හර පද්ධතීන් ලාබ තීරුවට යට කල යුගය වෙනුවට නැවතත් මනුශ්‍යත්වය කරා යාමට දැනුවත් මිනිසුන් ,ගැහැනුන් තුල වන බලවත් උවමනාවේ පිලිබිඹුව එයයි.

ඉන්දියානු සමාජ ක්‍රියාකාරිනියක් වන වන්දනා ශිවා පවසන පරිදි "අද අප බලකර සිටින්නේ G8 වෙනුවට සමස්ථ මනුශ්‍යත්වය එනම් G7,000,000,000 ආදේශ කල යුතු" බවයි.

'ඔක්‍යුපයින්ග් වෝල් ස්ට්‍රීට්' ව්‍යාපාරයට සහෝදරාත්මක සහයෝගය පල කර ලොව පුරා ඔක්තෝබර් 15 එනම් අද , මහාද්වීප 6 කට අයත් රටවල් 82ක නගර 1000කට වැඩි ගනනක පැවත්වෙන විරෝධතා වෙනුවෙන්, නිකුත් කල ප්‍රකාශනය 'ඊනියා ගෝලීය ලිබරල්වාදය' නිරුවත් කල සංක්ශිප්ත වුවත් බලවත් සටහනකි. ගෝලීය වෙනසක් උදෙසා, ගෝලීය ප්‍රජාතන්ත්‍රවාදය උදෙසා, ජනතාව වෙනුවෙන්  ජනතාව විසින් ක්‍රියාත්මක කරන යහ පාලනයක් උදෙසා ගෝලීය එක්සත් වීමකට ඇරයුම් කරන මේ ප්‍රකාශණය , බ්‍රිතාන්‍යය,ඊජිප්තුව,ටියුනීසියාව,ජර්මනිය,ස්පාඥ්ඥය,ඇමරිකාව,බ්‍රසීලය,පලස්තීනය,ඊශ්‍රායලය,මෙක්සිකෝව, උරුගුවේ,ආර්ජන්ටීනාව,ඉන්දියාව හා ඕස්ට්‍රේලියාව වැනි රටවල සමාජ ප්‍රජතන්ත්‍රවාදී ව්‍යාපාර, ක්‍රියාධාරීන්, ජනතා එකමුතුවන් වල අදහස් උදහස් කැටි කොට ලියැවී ඇත.

මනුශ්ෂත්වය වෙනුවෙන් 'රෙජීම වෙනසක්' උදෙසා වූ ප්‍රකාශනය

2011 ඔක්තෝබර් 15 දින ගෝලීය වෙනසක් සඳහා එක්සත්ව, ගෝලීය ප්‍රජතන්ත්‍රවාදය හා ජනතාව විසින් ජනතාව උදෙසා වූ ගෝලීය යහ පාලනයක් අපි බලකර ඉල්ලාසිටිමු.ටියුනීසියාවේ, ඊජිප්තුවේ,ලිබියාවේ,සිරියාවේ,බහරේනයේ,නිව්යොර්ක් හි, ඊශ්‍රායලයේ,ග්‍රීසියේ,ස්පාඥ්ඥ්‍යයේ නැගීසිටින අප සහෝදර සහෝදරියන්ගේ සටන්කාමීත්වයේ ආශ්වාදයෙන් යුතුව අප බලකර සිටින්නේ, රෙජීම වෙනසකටය. ගෝලීය රෙජීම වෙනසකටය.

ප්‍රජතන්ත්‍රවිරෝදී ජාත්‍යන්තර ආයතන යනු, අපගේ ගෝලීය මුබාරක්ලාය, අපගේ ගෝලීය අසාද්ලාය, අපගේ ගෝලීය ගඩාෆිලාය. ජාත්‍යන්තර මූල්‍ය අරමුදල, ලෝක වෙළඳ සංවිධානය, ගෝලීය වෙලඳපොල, බහුජාතික බැංකු,G8/G20,යුරෝපියානු මධ්‍යම බැංකුව,එක්සත් ජාතීන්ගේ ආරක්ෂක මණ්ඩලය වැනි ආයතන මේවාට අයත්ය.

අසාද්ලා ,මුබාරක්ලා මෙන්ම ඉහත ආයතන වලටද ජනතාවගේ කැමැත්ත නොමැතිව, ඔවුන්ගේ ජීවිත හසුරුවන්නට ඉඩ දිය යුතු නැත. දුප්පත් වේවා පොහොසත් වේවා, ගැහැනු වේවා පිරිමි වේවා අප සියල්ලන්ම සමානයන් ලෙස ඉපදුනෙමු. සෑම අප්‍රිකානුවෙක්ම, ආසියානුවෙක්ම, යුරෝපියෙකුට, ඇමරිකානුවෙකුට සමානය. ගෝලීය ආයතන තුල මෙය පිලිබිඹු විය යුතුය. නැත් නම් ඒවා පෙරලා දැමිය යුතුය.

ඉතිහාසයේ අන් කවර දාකටත් වඩා අද දවසේ, අපේ ජීවිත හසුරුවන්නේ මේ ගෝලීය බලවේගයන්ය. අපේ රැකියාව,සෞඛ්‍යය, නිවාස අධ්‍යාපනය,විශ්‍රාම වැටුප යනාදී සියල්ලක්ම පාලනය කරන්නේ, ගෝලීය බැංකු, වෙළඳපොල,සංස්ථා, මූල්‍ය අර්බූද වැනි දෑය. වෙනත් මහාද්වීපයක සිදුකරන, පරිසර දූශනය නිස අපේ පරිසරය විනාශ වී යයි. අපේ ආරක්ෂාව තීරනය කරන්නේ ජාත්‍යන්තර යුද්ධ, ජාත්‍යන්තර යුධ අවි වෙළඳාම, මත්ද්‍රව්‍යය හෝ ස්වභාවික සම්පත්ය. අපේ ජීවිතවල පාලනය අප අතින් ගිලිහෙමින් පවතී. මෙය නැවතිය යුතුය. මෙය නවතනු ඇත.

අද අපි මෙක්සිකානු සැපටිස්ටාවන් සේ මෙසේ කියමු, "¡Ya basta! Aquí el pueblo manda y el gobierno obedece":'ඇති, මේ ජනතාවගේ අණයි, ගෝලීය ආයතන එය පිලිපදිනු' අද අපි ස්පාඥ්ඥ ටොමලප්ලාසාවන් සේ මෙසේ කියමු,'"Democracia Real Ya": ‘සැබෑ ගෝලීය ප්‍රජතන්ත්‍රවාදය දියවු’. ද අපි සියලු ලෝක පුරවැසියන්ට ආරාධනා කරමු, අපි ටහ්-රිර් චතුරස්‍රය ගෝලීයකරනය කරමු.පුවර්ටා ඩෙල් සෝලාව ගෝලීයකරනය කරමු.

දශක තුනහමාරකට ආසන්න කාලයක් මේ 'ඊනියා ගෝලීය ලිබරල් ආර්ථික' මඩ ගොහොරුවේ ගාටන අපේ රටටද අද ඇවැසිව ඇත්තේ මේ වෙනසයි.මනුශ්ෂත්වයයි. ලොව පුරා සෙමෙන් හමන මේ වෙනසක සුළඟ අපේ ආදරණීය මවුබිම හරහා හමන්නේ කවදාද? ගෝලීය සහෝදරවරුනි, ඔබේ ගිටාරයේ, බැලලයිකාවේ හඬට, අපේ සිතාරයේ සර මුසු කරන්නට අපි බලා සිටිමු. නිදිගැට හැර ලොව දෙස බලන්නට මගේ සහෝදරයන්ට, ආයාචනා කරමි.

රෙජීමාදිපතිගෙ මෝඩ ජෝක් අසමින්, කුරහන් තලප හපන්නට මසකට සැරයක් අරලිය මැදුරු වන්දනාවේ යන පුවත් කතුවරුන්ගේ පත්තර කඩමාලුවලින් මේවැනි මාතෘකා කථාකරවියැයි සිතීම උගහටය.  බ්ලොග් අවකාශය තුල අවම තරමින් සංවාදයක්වත් ආරම්භ කරන්නට මනුශ්ෂත්වයේ නාමයෙන්, ආදරණීය මිනිසුන්ට ආයාචනා කරමි.

බ්ලොග් ලියන අපිට අදහසක් කපුගේගෙන්

සබඳ අපි කඳු නොවෙමු~ 
උනුන් පරයා නැඟෙන~ 
සුනිල දිය දහර වෙමු~ 
එකම ගඟකට වැටෙන~ 
වියරු ගිනි දැල් නොවෙමු~ 
වනය අවුලාතබන~
සිහිල දෙන වැස්ස වෙමු~ 
දැවෙන කැලයට වසින~ 
නපුරු හීනය නොවෙමු~ 
ළමුන් නිදි සුව බිඳින~ 
සොඳුරු අඬහැරය වෙමු~
දනන් නින්දෙන් මුදන~ 
-(ගුනදාස කපුගේ)